Aurtengo ibai garbiketa zapatuan egingo da, herriko eragile ugarirekin batera

Azken urteetan egiten duten moduan, ibai garbiketa antolatu dute Soraluzeko Udaleko Ingurumen eta Landa Garapen Departamentuak, herriko Soraluzeko Baso Biziak Elkarteak eta Lurgaia fundazioak herriko hainbat eragile eta elkarteren parte-hartzearekin.

Datorren zapatuan, apirilaren 18an, goizeko 9:30etan elkartuko dira bolondresak Plaza Barrixan. 

Parte hartze oparoa

Ibai garbiketaren antolatzaileek herriko eragile eta elkarte ugariren parte hartzea izango dute gainera; izan ere, elkarrekin lan egiteak ekintza herritar gehiagorengana hurbiltzeko eta modu komunitarioagoan egiteko aukera ematen du. Hauexek dira ibai garbiketaren helburuak:

• Ingurumenarekiko konpromisoa sustatzea.
• Herritarren inplikazioa areagotzea.
• Komunitateko kide guztien parte-hartze aktiboa bultzatzea.

Arropa egokia eta antolaketa

Antolakuntzak parte-hartzaileei eskatzen die arropa zaharra eta erosoa eramateko eta uretan sartu nahi izanez gero (ez da derrigorrezkoa) gomazko botak edo badeadorea; eskularruak eta lanerako tresnak antolakuntzak ipiniko ditu, eta garbiketarekin bukatu ostean, hamaiketakoa ere eskainiko du parte-hartzaileentzako.

Bazkal ordurako etxera itzuliko dira parte-hartzaileak.

Izen-ematea, apirilaren 16ra arte

Izena emateko, bidali e-mail bat, eguena, apirilaren 16a baino lehen izen-abizenak, adina eta herria zehaztuz helbide honetara (Gaia: ibai garbiketa, Soraluze): 

• info@lurgaia.org
• soraluzekobasobiziak@gmail.com