Gabolats kalearen urbanizazioa

2018/01/04

Urtarrilean emango zaie hasiera Gabolats kalean oinezkoei lehentasuna emango dien plataforma bakarreko bidea eraikitzeko lanei; Construcciones Morga, S.L enpresari adjudikatu dizkio lanak Soraluzeko Udalak.

Soraluzeko Udaleko Obren eta Herriko Mantentze-lanen Batzordeko lehendakari Iñaki Rubiok jakinarazi duenez, urtarrilean zehar emango zaie hasiera Gabolats kalearen urbanizazio-lanei.

Lan hauei esker, oinezkoei lehentasuna emango dien plataforma bakarreko bidea eraikiko da.

Helburua oinezkoek eta ibilgailuek partekatuko duten plataforma bakarreko bidea eraikitzea da, oinezkoei lehentasuna emanez; bai eta aparkaleku-gunea berrantolatzea eta irisgarritasun alorreko araudia betetzea.

Horretarako, espaloia eta bidea eraitsi egingo dira, ondoren kale berria maila berean eraikitzeko. Bide batez, bide-zorua altxatu egingo dela aprobetxatuz, ur-horniketa sarea hobetzeko lanak ere egingo dira.

Lanak Construcciones Morga, S.L. enpresak burutuko ditu eta 130.978,92 € + BEZa 27.505,58 euroan adjudikatu ditu Udalak.