Maiatzaren 5etik 9ra Errekalde 1etik Errabal 13ra bideko arketak konponduko dira eta horrek eragina izango du trafikoan, autobus-zerbitzuan eta garajeetan

Datorren astean, astelehenetik barixakura, egoera txarrean dauden arketak konponduko ditu Euskaltel enpresak eta udalak ere baliatuko du bere ardurakoak diren euri-uren arketak egokitzeko. Hori horrela izanik, zenbait aldaketa eta eragin izango dira trafikoan, autobus-zerbitzuan eta garaje pribatuetako sarrera eta irteeretan. 

Soraluzeko Hirigintza Departamentuak ondorengo neurriak hartu ditu.

Trafikoan eta autobus-zerbitzuan eragina

Maiatzaren 5etik 9ra bitarte, egunero: 

• Autobus-zerbitzuak aldaketak izango ditu Maltzagarako noranzkoan. Zubi Nagusiko eta SAPAko autobus geltokiak ezingo dira erabili, astelehenean goizeko 8:30etatik ostiraleko 14:00ak bitarte. Geltoki horien ordez, Estaziñoko eta Ezozibideko geltokiak erabili beharko dira. Horretarako, saihesbidea bi norantzatan egokituko da semaforoen bidez.
• Mendarorako lineako autobusa Estaziñoko eta Ezozibideko Bergarako noranzkoko geltokietan hartu ahal izango da, ohiko Oleako zubiko geltokiaz gain.

Maiatzaren 5etik 7ra bitarte, egunero, 8:30etatik 17:30era:

• Oleako zubitik Zubi Nagusira arteko tartea autoentzako itxita egongo da. 
• Errabal 1-eko garajeak ezingo dira erabili.
• Tarte horretan, Baltegietara joan nahi duten kotxeek Santa Anatik sartu beharko dute, eta Zubi Nagusia gurutzatu. Hortaz, Santa Ana eta Zubi Nagusiko oinezkoen eremua, arratsaldeko 17:30etatik aurrera egongo da martxan, ohiko 15:00etan beharrean.
• Atxuriko aldapatik egoitzarako bidea itxita egongo da.

Udala herritarrekin eskertuta

Soraluzeko Udalak bere esker ona azaldu nahi die herritarrei herrian egiten ari diren obra eta konponketa-lanek sortutako traba eta eraginen aurrean erakutsitako jarrera ulerkorragatik.