Munduko ipuinez beteko dira Soraluzeko kaleak hirugarrenez, irailaren 26an, zapatua

Pil-pilean Euskaltzaleen Elkarteak, Udaleko Kultura Batzordeak eta Udal Liburutegiak elkarlanean antolatu dute Munduko ipuinen egunaren hirugarren edizioa, irailaren 26an Soraluzeko bazterrak hainbat txokotako hizkuntzaz eta istorioz beteko dituen ipuinen festa.

Gure herrian euskaraz gain, beste hainbat hizkuntza hitz egiten dira; hala nola, gaztelania, galegoa, katalana, arabiera, amazigera, urdua, punjabiera, italiera, ingelesa, alemana... Hizkuntza aniztasun horri aitortza egin nahi dio datorren asteko festak, herritarren zein hizkuntz komunitateen arteko hartu-emanak ahalbidetzea bultzatu eta ipuinen balioa sustatu.

Hainbat hizkuntza eta jatorritako ipuin kontaketak izango dira egunaren oinarria, eta txotxongilo tailerra eta liburutegi txokoa ere egongo da. Ipuinek kaleak hartuko dituzte, izan ere, eskaintza guztia Soraluzeko kaleetan izango da, herriko hainbat txokotan.

Berritasunak ere bai

Aurtengo edizioak berritasunak dakartza; izan ere, txotxongilo tailerra programatu du antolakuntzak Munduko ipuinen egunari hasiera emateko eta helduentzako ipuin-kontaketa batek emango dio amaiera.

TOPIC Tolosako Nazioarteko Txotxongilo Zentroak eskainiko du Bokoien munduan barna tailerra, familientzat. 5 urtetik gorako neska-mutikoek parte hartu ahal izango dute, heldu batek lagunduta. Tailerra doakoa izango da, baina, aurrez izena eman beharko da, plazak mugatuak baitira.

Helduentzako ipuin-kontaketak, ostera, kapillan emango dio amaiera goxo eta intimoa  kontakizun eta istorioz betetako egunari.

Programazioa

Eguneko lehendabiziko ekintzak txotxongilo tailerra eta liburutegi txokoa izango dira; jarraian, ipuin-kontaketan bata bestearen atzetik kateatuko dira iluntzera arte.

Ipuinek ez dute adinik, ezta mugarik ere. Eskainiko diren ipuin kontaketak, azkena izan ezik, adin guztietarako pertsonentzat izango dira eta mugaz gaindi eramango dute ipuinek entzulea gertuko zein urruneko txokoetara.