Oinezko eta ibilgailuentzat zabalik dago Gabolatseko zubi berria
Duela bi urte, 2023an, aurkeztu zuen Soraluzeko Udalak URA-Uraren Euskal Agentziarekin batera Gabolatseko zubia ordezkatzeko proiektua, uholde-arriskua murriztea helburu hartuta. Lanak urtarrilean hasi ziren, eta aurreikuspenak betez, zortzi hilabeteko iraupena izan dute.
Zubi berriak ez du euskarririk izango ibilguan eta zubi zaharrarekin alderatuta 53 cm altxatu da taularen oinarria. Horrela, ur-laminaren goratasuna nabarmen murriztuko da uraldietan. Zehazki, Gabolats zubia ordezteak 50 urteko errepikatze-denborako uralditik —Soraluzerako zehaztutako defentsa-helburua— zubiaren eta Malmero presa txikiaren arteko tartean dauden etxebizitzak defendatzea lortuko du.
Zubia dagoeneko zabalik
Gaur, barixakua, abuztuak 29, zabaldu da Gabolatseko zubi berria oinezko eta ibilgaluentzat, behin-behineko harrera-akta sinatu ondoren.
Izan ere, lan txiki batzuk geratu dira egiteko proiektuari behin-betiko amaiera eman ahal izateko: hala nola, behe-tentsioko behin-behineko linea kentzea, zubiko argiztapenerako instalazio elektrikoa egitea, landaketak egitea txorkoetan eta harmailetan egurrezko listoiak jartzea.
Zubi inguruak ere txukunduko dira
Gabolatseko zubi berria ipintzeko lanak aprobetxatuz, ingurak ere txukunduko dira: landaketak egingo dira SAPAko barruko harmailan zein ibai aldean eta SAPA eta Baltegieta 22 bitarteko galtzada-harri birjarriko da.
Galtzada-harria birjartzeko lanen esleipena lehiaketara atera du Soraluzeko Udalak, eta irailaren 5era arteko epea dago eskaerak egiteko.
Aurreikuspenen arabera, udazkenean egingo dira lanok eta gehienez ere 5 asteko epea izango da amaitzeko. Aurrekontuari dagokionez, 104.325, 07€ izango da BEZ barne.
Pleguak, informazio guztiarekin eta kontratua esleitzeko kontuan hartuko diren irizpide guztiekin, honako esteka hauetan kontsulta daitezke: