Soraluzeko Udalak herriko erraldoiak egin eta konpartsa osatzeko bilera irekia egingo du eguaztenean

Azken urteotan Soraluzeko erraldoiak berriz ere dantzan ikusteko nahia pizten ari da herritarren artean. Hori horrela izan dadin, erraldoiak eurak sortzeaz gain, beharrezkoa da dantzan jarriko dituzten konpartsa sortzea: bai erraldoiak eramateko, baita musika jotzeko ere.

Herritarren nahiak, ideiak eta ilusioak ezagutu eta erraldoiak sortzeko prozesuari ekiteko, bilera irekira deitu ditu soraluzetarrak Udalak: bihar, eguaztena, azaroak 12, egingo da Kalebarren 8n, arratsaldeko 17:00etan. Bertan, lehendabiziko pausoak emango dira erraldoien nondik norakoak erabakitzeko; hala nola, nolako pertsonaiak sortu, zenbat erraldoi egin eta konpartsa nola osatu.

Bileran hitza hartuko du inguruko herri bateko konpartsakide batek, eta bere herriko erraldoien konpartsaren esperientzia partekatuko du parte-hartzaileekin.

Soraluzeko Udalak herritar oro, gazte zein heldu, animatu nahi du erraldoiak sortzeko prozesuan parte hartzera.